સુરતી ઘારી
Ingredients - સામગ્રી:
- ૧૦૦ ગ્રામ મેંદો
- ચોક્ખું ઘી
- ૧૦ ગ્રામ બદામ પીસ્તાનો ભૂકો
- ૧ ચમચી મિલ્ક પાવડર
- ઈલાયચી
- જાયફળ
- ખાંડેલી જાવંત્રી
- ૧૦૦ ગ્રામ માવો
- ૬૦ ગ્રામ બૂરુ ખાંડ
- તળવા માટે ઘી
- ૧૦ ગ્રામ બૂરુ ખાંડ+ચોક્ખું ઘી+ડાલ્ડા ઘી ઘારીને પીવડાવવા
રીત:
- મેંદામાં મૂઠી પડતું ચોખ્ખા ઘીનું મોણ નાખો. ઠંડા પાણીથી લોટ બાંધો. પૂરી જેવા લૂવા કરીને પાતળી પૂરી વણો.
- આ પછી બદામ પીસ્તા ખાંડીને નાખો. તેમાં મિલ્ક પાઉડર ઈલાયચી જાયફળ જાવંત્રી ખાંડીને પ્રમાણસર નાખો. માવાને ધીમા તાપે શેકો અને તેનું ઘી છૂટું પડતા બદામ, પીસ્તા, જાયફળ, જાવંત્રી, ઈલાયચી નાખી ૧ મિનીટ શેકો. પૂરણ ઠંડુ કર્યા પછી બૂરું ખાંડ મેળવો. મેંદાની વણેલી પૂરીને ચોરસ કાપી તેમાં માવાને પેટીસ આકાર આપી મૂકો. સામસામેના પડ સહેજ પાણીથી ચોંટાદો.
- હવે ઘીમાં તળો. ઠંડી પડતા ડાલ્ડા ઘી અને ચોક્ખું ધી સહેજ ગરમ કરો. તેને નીચે ઉતારી બૂરું ખાંડ ભેળવો. ચોથા ભાગનો કપ ઘી હોય તો ૧ ચમચી ખાંડ નાખો. તૈયાર કરેલી ઘારી, ઘી ખાંડમાં બે ત્રણ વખત બોળીને બહાર થાળીમાં મૂકો. ઉપરનું પડ વધુ જાડુ કરવા ઘારીને થોડી વાર રેફ્રીજરેટરમાં મૂકી ફરી ઘીમાં બોળો.
કાજુકતરી
Ingredients - સામગ્રી:
- બસો ગ્રામ કાજુ
- ૧૦૦ ગ્રામ ખાંડ
- ૧ ટી સ્પૂન ઘી
- વરખ
રીત:
- ખાંડ લઈને ખાંડ ડૂબે એટલુ પાણી ઉમેરી સ્ટવ પર લઈ ચાસણી કરો.
- જો મેલ દેખાય તો ઉકળે એટલે સહેજ દૂધ નાખીને મેલ કાઢી નાખવો.
- ટપકું મૂકો તો ખસે નહીં તેવી ત્રણ તારની ચાસણી તૈયાર થઈ ગયેલી જણાય એટલે કાજુનો ભૂકો કરીને ચાસણીમાં નાખો અને મિશ્રણને સારી એવી હલાવો.
- રોટલો વણાય એવું બંધારણ થયેલુ જણાય એટલે તેમાં ૧ ચમચી ઘી નાખી સારી પેઠે હલાવી સ્ટવથી નીચે ઉતારો અને બે પ્લાસ્ટિક વચ્ચે મૂકી વણો.
- વરખ લગાડીને કાપા કરો. કાજુકતરી તૈયાર.
મોહનથાળ
Ingredients - સામગ્રી
- ૧ કપ ચણાનો કગરો(જાડો) લોટ
- ૧ કપ ખાંડ
- ૧ કપ ઘી
- ૫૦ ગ્રામ માવો
- ૧ ચમચી બદામ પીસ્તાની કતરી
- ચાંદીનો વરખ
- થોડુ કેસર
- થોડી ઈલાયચી વાટેલા
રીત:
- ૧ થાળીમાં ચણાનો લોટ લઈને વચ્ચે ખાડો કરી ૧ ચમચી દૂધ મૂકી પાંચ મિનીટ ઢાંકી દો અને પછી તેને ચાળે લો.
- એક તપેલીમાં ખાંડ લઈ તેમાં ડૂબે એટલું પાણી લઈ ચાસણી કરવા ધીમા તાપે ગેસ પર મૂકો. પાણી ઉકળે એટલે તેમાં ૨ ચમચી દૂધ નાખો જેથી ખાંડનો કચરો ઉપર આવી જશે. આ કચરો કાઢી નાખો. જ્યારે થાળીમાં ટપકુ પાડો ને એ ટપકુ રેલાય નહી ત્યારે સમજવુ કે ચાસણી થઈ ગઈ છે. તેમાં કેસર ઈલાયચીનો ભૂકો ઉમેરો. પછી તેને ગેસ પરથી ઉતારી લો.
- એક તવામાં ઘી ગરમ કરવા મૂકી એમાં ચાળેલો ચણાનો લોટ ધીમા તાપે શેકો. ધીરે ધીરે ગુલાબી થવા માંડશે. ઘેરો ગુલાબી થતા તેમાં માવો ઉમેરો અને પાંચ દસ સેકંડ માટે શેકો અને પછી ગેસ પરથી નીચે ઉતારી તેમાં ગરમ ચાસણી ઉમેરી હલાવતા રહેવું. જ્યારે તે ઠરવા લાગે ત્યારે થોડું ઘી લગાડી તૈયાર રાખેલી થાળીમાં પથરવું. તેની પર તરત જ બદામ પીસ્તાની કતરી પાથરી ન દેવી નહીં તો તેમા ચોંટશે જ નહી. ત્યારબાદ તરત જ તેની ઉપર ચાંદીનો વરખ પાથરી દેવો.ઠંડુ પડતા ચોસલા પાડી દેવા.સ્વાદિષ્ટ મોહનથાળ તૈયાર.
